من سار بين الناس جابراً للخواطر أدركه الله فى جوف المخاطر



فى يوم اكتشفت إن أمى بتزور واحدة فى منطقتنا بشنطة فيها حبوب وزيت ولحم وكده
والست دى كانت مش محتاجه فى وجهة نظرى
فسألت أمى : ليه يا أمى بتساعدى الست دى وهى مش فقيرة أصلا !!
قالت : فى يوم روحت أزورها وحسيت إنها محتاجه ، وهى مقالتش .. تعرف هى مش فقيرة بس محتاجة ، قمت قلتلها يا أم فلان أنا يا اختى بيجيلى كل شهر شنطه فيها حاجات زيادة ليا ، وبتكفى وتفيض .. أهل الخير بيجيبوهالى وبيوسعوا عليا .. هجيبلك يا اختى نصها لإنها حرام بتفيض من عندى وأنا مستحرمة واتكسف آدى لحد غريب 
يعنى إمى إدعت إنها فقيرة وإن أهل الخير بيساعدوها علشان تعرف تقنعها إنها تجيب لها شنطة ، رغم إن أمى هى اللى بتعمل الشنط دى للفقراء .. بس علشان متحرجهاش لإن الست متعففه أوى .
سألت أمى : بس ليه كده
قالت : جبر الخواطر على الله يا مصطفى
حسيت بمعنى " من سار بين الناس جابرا للخواطر ..أدركه الله فى جوف المخاطر .. ! "
لإنى عمر ما شفت أمى مكسورة إلا والاقى ربنا مسح عليها وجبر كسرها .. ويطلع حاجه من تحت الأرض تساعدها ، 
كانت تمر أيام ليس فى البيت ( جنيه واحد ) فتدخل تصلى وتقول يارب ( عشرين جنيه ) أمشى البيت بكره .. 
تخلص صلاة تلاقى الباب بيخبط : والدتى باعته لحضرتك العشرين جنيه دى وبتقولك كده دى آخر عشرين جنيه فى الفلوس اللى عليها .
آه والله ..
تجرى جرى عا السجادة تقول : يارب الجنة ، بقى يبقى باب السما مفتوح وانا ادعيك بعشرين جنيه ، ده انا فقر أوى .. يارب الجنة ...
..
زمان لما كنت بسمع الإمام فى صلاة الجمعة يقول ( يا جبار السماوات والأرض ) 
أعرف على طول إنه هيجيب سيرة المسلمين فى فلسطين وهيدعى على اليهود ومن هاودهم وعلى النصارى ومن ناصرهم ..
وبقى اسم الجبار عندى مرتبط بالقوة ..
وبعدين عرفت إن ربنا الجبار ( للمنكسرة قلوبهم )
زى الجبيرة كده .. بتتحط على الكسر علشان تصلحه
عرفت إن اسم ربنا الجبار مش بس معناه القوة ، بل فى نفس الوقت معناه جبر الكسر الناتج عن جبروت غيره
فيجبر قوة المنكسر .. ويجبر جبروت الذى كسره .. 
يعنى يصلح له الكسر بتاعه وينتقم له من اللى كسره ...
خليك جبس لقلب واحد محتاج منك بس كلمة تقول له أنا جنبك ..
ومتنساش أنه ورد فى الأثر 
( ما عُبد الله بشىء أفضل من جبر الخواطر )
" من سار بين الناس جابرا للخواطر ..أدركه الله فى جوف المخاطر .. ! "
امسح على قلبهم يمسح على قلبك لما ينكسر .. أو بكرمه يعافيك من الكسر .
دمتم جابرى خواطر المنكسرين 


« جبر الخواطر »
لمصطفي عبدالناصر